【防疫上班攻略】辦公室抗疫5招
於五月至六月，新型冠狀病毒稍為轉趨穩定，再加上炎熱嘅天氣，從街上可以觀察到市民嘅防疫意識開始下降。例如多咗人出街唔戴口罩，社交距離亦逐漸放鬆。近日，新型冠狀病毒第三波開始爆發，不少於10名公務人員染上新型冠狀病毒。香港亦於7月16日新增確診個案高達67宗。所以大家千祈唔好鬆懈，要保持高度防疫意識。如果公司未能安排在家工作，打工仔就更加應該加強工作地方清潔。以下有五個關於工作防疫貼士建議。
1.加強消毒工作環境
防疫期間每人都應該隨身攜帶一支消毒酒精，隨時清潔個人物品。進入工作地點前應該用1:49家用漂白水清潔鞋底先至入去工作地點，並且量度體溫。所有會經常接觸嘅物品，例如燈制、電腦鍵盤、打卡機及辦公桌等，員工都應該每日用酒精清潔呢類型物品最少兩次，杜絕病毒停留於物品表面。如果有發燒或者身體不適就應該盡快求醫，並且避免上班。
2.勤洗手
每日勤洗手成為不可缺少嘅防疫生活習慣。有部份人會選擇長期戴手套代替洗手，但係其實唔同類型嘅手套對防止病毒嘅程度都有所不同。例如防水膠手套除咗防水之外，亦比較能有效阻隔病毒。但係棉質或者勞工手套對阻擋病毒嘅能力就相對較低。如果工作嘅時候有需要經常除低手套嘅話，喺過程中會好容易感染到細菌。喺呢類情況底下，勤洗手比戴手套就會更加安全。
3.保持社交距離
根據政府指引，防疫期間如果喺戶外大家應該保持一米社交距離。如果喺室內就應該保持1.5米社交距離，減低互相傳染嘅機率。除此之外，同事之間及客戶都應該避免身體接觸及握手；可以用點頭或者口頭打招呼作代替。應該避免任何聚餐，預防感染病毒嘅機會。
4.保持空氣流通
保持空氣流通係防疫非常重要嘅一環。空氣流通可以大大減低病毒傳播範圍，同埋感染機率。喺炎熱嘅夏天，大部份工作地點都會開冷氣，而未能時常保持空氣流通。當員工係密閉嘅空間，建議一直戴上口罩，減低感染風險。
5.避免使用公用物品
喺疫情期間鼓勵員工自行攜帶水杯、食物用具及清潔餐具嘅清潔用品。茶水間嘅公用杯、碗筷及百潔布就盡量避免使用，以策安全。
如有任何關於2019冠狀病毒病疑問或希望查看最新情況，可以瀏覽衞生防護中心網站查詢。
衞生防護中心熱線電話： 2125 1111 / 2125 1122 (上午九時至晚上十時運作) 民政事務總署熱線電話： 2835 1473 (上午九時至晚上六時運作) 「香港特別行政區政府COVID-19」 WhatsApp熱線： WhatsApp9617 1823