【轉工】5大轉工考慮因素 逆市轉工好難搵？減薪轉工？半年轉一次工？

1.薪金

人望高處，如果新嘅工作提供更高嘅人工，當然會心動。不過記住要將表面嘅加幅，扣除額外嘅開支，先至係真正嘅收入。例如如果新公司人工只係微調一至兩千蚊，但係工時及交通時間長咗，車費及公司附近嘅餐廳又貴咗，扣除日常車費及午餐開支，再除開增加嘅工時及搭車時間，其實可能仲賺得少過以前。 計劃事業道路需要諗長線，如果你一直無提升技能及累積工作經驗，就會永遠都落入用時間換金錢嘅輪迴。如果長期每份工都做唔夠一年，單純為咗小量薪金加幅就轉工轉行，其實最終可能得不償失。一時賺多一千幾百，長遠計，會減低你嘅議價能力，仲會影響你將來僱主對你嘅感觀。

2.員工福利

有啲工未必特別高人工，但係就有好多福利。例如專業在職培訓、勤工獎、有薪婚假、有薪恩恤假、公佣制度、額外獎金、地區車資津貼及醫療保險。有時善用公司嘅福利，其實仲好過加人工。考慮轉工嘅時候，可以對比新舊公司嘅員工福利。

3.個人心態及進步空間

轉工之前要問自己因為乜野令你想轉工。人事關係？工作遇到困難？無發展空間？如果可以透過跟老世嘅溝通及同事嘅幫助就可以解決嘅問題，其實無需要轉工。相反，如果係自身嘅問題，例如性格缺陷、溝通能力或者能力不遞，其實轉換工作環境及同事都唔會帶嚟改變。而且賠上喺舊公司跟同事、老世用長時間建立嘅信任、關係磨合及一份穩定嘅工作，咁就得不償失。

4.技能培訓及晉升前景

有好多公司都有提供技能培訓及明確嘅晉升階梯。如果你而家嘅薪金或職位未如理想，其實不妨同僱主溝通，爭取技能培訓或者晉升機會。例如飲食界會提供一啲店舖主任培訓課程，包括基礎人員管理、督導技能、現金管理、現場督導及訓練新進夥伴。零售界亦可能提供零售管理培訓課程，例如如何帶動同事提升工作動力、指派任務、解決問題、改善工作表現、提升分店利潤及管理分店等。 呢類型嘅培訓可以幫助你提升技能及喺職場擁有更高嘅儀價能力，從而得到更好嘅收入，有助長遠發展。呢啲機會通常都係安排俾一啲年資比較高嘅僱員，所以想轉工之前，不妨先試下爭取技能培訓及晉升機會，可能有意外驚喜。

5.自己的人生階段

唔同嘅人生階段有唔同程度嘅擔子。如果你仲年輕又無家庭負擔，想多方面嘗試，發掘自己嘅興趣當然係無問題。但係如果你有家庭負擔，需要養育子女、交租或供樓，咁就更加需要三思而後行。轉工最緊要轉得值得，要先評估新舊公司各方面嘅利弊，為自己嘅事業道路定立明確嘅目標再跟同家人朋友商量，再下決定，咁就萬無一失。