玩Lego原來可以咁認真
今年二月，我哋Moovup同Y.E.S. 青年就業起點一齊邀請咗一班15-29歲嘅後生仔女嚟我哋嘅 “Lego® Serious Play®Workshop” (LSP)。聽到個名可能好多人都會話，玩Lego啫，駛唔駛咁認真呀？究竟咩令呢班後生咁想認真對待Lego呢？
其實早喺2004年LSP 已經開始喺歐美地區流行。Lego CEO Kjeld Kirk Kristiansen 覺得Lego嘅目的就係叫細路仔利用Lego發揮創意、建立自己嘅夢想，咁點解大人唔可以建立自己嘅願景或策略呢？於是經過不斷實驗，Lego就推出LSP並培訓一班認證嘅引導師去搞工作坊。有唔少嘅企業都透過LSP去開會一齊brainstorm，甚至做team building添！
而今次我哋就搵咗認證引導師李德威先生帶我哋透過LSP去了解自己嘅性格特質，等Lego講返一啲關於我哋性格嘅小秘密比自己聽。
當日引導師叫大家用Lego去思考一啲有趣嘅問題，例如一句觸動你嘅說話、一次笑唔停嘅經驗、人生中邊個角色佔咗你大部份嘅時間等，令到唔少參加者（包括小編本人）都了解自己多咗。我仲發現，同組入面我嘅笑點係最低咖！
小編認為最好玩嘅一個環節就係當大家砌好並介紹自己嘅Lego之後，將佢傳比隔嚟位，然後大家就要喺人哋個模型上面重新再砌啲新嘢出嚟。呢一part大家最享受，因為好多搞笑嘅ideas就係咁樣產生。同埋真係充分體會多角度思考，因為喺A同學眼中嘅長褲，喺B同學眼中可以變咗兩條廚師腸咖。
總括呢個活動小編覺得好有趣。了解咗自己嘅個性之後，真係可以諗返點樣喺職場運用呀：
- 為人獨立，喜歡獨自解決問題 （所以我咪做編輯囉。自己專心寫自己嘢）
- 笑點低（所以我寫cover letter 唔可以好似人哋咁懶幽默，因為好多人笑點高過我，睇唔出笑位喺邊就會覺得我try too hard咖喇！）
- 喜歡自由（所以做自由創作呢類工作，如果叫我日日朝九晚六對住啲數字我會癲咖！）
