【求職騙案】如何避免跌入求職騙案圈套？

面試前：

1. 公司背景資料搜查

見工之前要先了解有關公司嘅背景、業務性質及規模等。求職者可以透過電話查詢、官方網站、網絡搜尋或行業討論區求證以上資料。例如查核公司有無喺香港正式註冊，公司地址或公司名稱係咪同面試地點吻合，避免墮入騙局及可以節省無謂嘅時間或潛在損失。

2. 徵詢家人朋友意見

見工之前可以同家人朋友分享該公司嘅資料或面試詳情，如家人及朋友覺得情況可疑，可以早一步提醒。

面試中或受聘前：

3. 切勿透露私人資料

喺簽署僱傭合約之前，求職者無需向僱主透露銀行、住址證明及身份証資料。即使簽署僱傭合約之後，所有僱員嘅私人資料影印本都應該蓋有「影印本」字眼嘅印章，確保所有影印本唔會被重覆使用於其他用途。

4. 小心簽署任何可疑文件

於簽署任何文件及合約之前，求職者可以要求僱主提供一份中英對照嘅版本，以便了解內容。求職者可以先拎返屋企，同家人朋友詳細了解內容，先決定應否簽署。

5. 切勿繳交任何費用

好少正統公司會要求未開工先付費，若求職公司要求繳交報名費、按金、培訓費、行政費、介紹費、保證金或申請貸款，求職者就需要額外小心，大多數都係騙局。