【廿一堂僱主專訪】唔識教到你識的日式餐廳

其實做飲食業唔只需要有精湛廚藝，態度同樣重要！新開張嘅日式餐飲品牌------「廿一堂」最重視員工有匠心精神------務實嚴謹、專注執著、精益求精！餐廳營運及發展部經理Taison強調：「我哋唔介意員工無任何相關經驗，甚至連公仔麵都唔識煮都唔係問題，因為我哋會提供在職培訓，唔識教到識。」

廿一堂係一間日式燒丼專門店，主打日式燒肉丼同其他日式丼，大部份原材料都會由日本進口。客人嚟到店舖基本上係全自助。客人先去自助點餐機點餐，再自行去取餐，然後再自助回收。而為咗保持店舖食物質素嘅穩定，每一位店務員都會有專業嘅培訓。「例如一塊燒肉，點樣可以燒得又快又靚？除左員工嘅技巧，我哋店舖亦都有配備十分專業嘅爐具去幫手。」Taison 補充，「員工喺店舖入面唔單單係整嘢食，更重要係監控食物嘅品質。」廿一堂嘅店務員同其他餐廳比較唔一樣，因為呢度嘅店務員都唔會固定只做一個位置，由樓面、收銀、水吧，再到廚房各個位置都有機會接觸得到。店務員Matt好鍾意呢種工作模式，「每做一段時間就轉換崗位，可以不斷學到新嘅知識，有滿足感之餘又唔會覺得返工好沉悶。」

Matt今年初先由琴行售貨員轉做飲食業，一切從零開始。Matt認為上司好樂意教導，「我哋上司同下屬之間都唔會有隔膜，可以做到朋友，又可以係上司身上學到好多嘢。」

「我哋暫時喺將軍澳有一間分店，好快中環分店都會開張，而喺2019年預計都會有3至5間分店喺港九新界唔同地方開設。」Taison話因爲廿一堂一直在擴張，所以都需要一直吸納更多嘅人才加入。「我哋都會傾向內部晉升，所以當店務員喺各個崗位都學得七七八八，我哋就會開始教一啲管理上嘅知識。」喺擴張嘅同時，晉升機會都會增多，所以有興趣嘅話就即管嚟應徵啦。

問到Taison同Matt有無見工tips俾大家，佢哋都不約而同覺得放鬆啲就可以。「其實都係講下自己嘅經驗同長處，展示自己嘅表達同溝通能力。而我哋希望員工會用心對待每一個細節，即使係再簡單嘅事都一樣看重。所以如果應徵者有朝氣、有熱誠都會加分㗎。」

工作內容：

• 全職/兼職
• 輪班工作（8小時工作 + 1小時用膳）
• 樓面、收銀、水吧、廚房

咩人啱：

• 18歲以上
• 有活力、有朝氣
• 有匠心精神
• 有熱誠

福利：

• 一小時有薪用膳時間
• 10日大假
• 在職培訓 (例如有語言培訓、服務技巧培訓、化妝班等)
• 年度員工旅行

空缺：接近50個