香港KOL網紅公司僱主專訪|Easy Line Up

Easy Line Up 係一間KOL嘅市場營銷公司(Influencer Marketing Agency)。「我哋嘅網上平台可以比客戶根據自己嘅要求配對合適嘅網絡紅人，並直接喺平台上傾合作嘅項目同價錢。另外，我哋都有客戶服務團隊（Account Servicing Team）為客戶提供一站式嘅服務。由策劃市場營銷活動至揀選同聯繫合適嘅網絡紅人，甚至拍片同籌辦活動，我哋都一手包辦。」前為KOL經理人嘅老闆CK講到。

寓工作於娛樂 同事之間亦師亦友

被問到同KOL嘅關係，CK就話好似朋友一樣：「有很多同事喺工作中認識咗一啲網絡紅人之後一拍即合，會喺工作以外約食飯、一齊玩。」佢憶述近期一個有趣嘅項目：某傢俬品牌要招募YouTubers改造屋企。同一般產品測試唔同，改造成個屋企係一個大工程，但YouTubers嘅反應出奇地唔錯，大家都紛紛拍片影相表示有興趣。而喺篩選嘅過程中，同事們都無意中發現鏡頭前整齊企理、大方得體嘅KOL，背後原來佢哋嘅房間可以係亂得咁不堪。佢哋更加同YouTubers friend到講笑話其實佢哋屋企唔需要改造，只需要一個會執屋嘅主人。最後公司揀咗屋企有幅爛牆嘅薑檸樂，一次過為佢屋企改頭換面。成個合作過程入面，個個同事都樂在其中。而最後見到薑檸樂嘅新居，同事們都真心戥佢高興。

半年前加入Easy Line Up嘅兼職阿Ken話，喺呢度除咗工作好玩之外，同事之間嘅關係亦非常融洽。啱啱返工時嘅阿Ken白紙一張，工作無從入手，身邊嘅全職兼職同事都好樂意咁幫佢，令佢好快上手。「其實新人最緊要唔好怕，有咩唔識就開口問。」

除咗工作有同事指點之餘，阿Ken亦好快同同事打成一片。例如前排同事為咗測試大家嘅膽量，喺午飯時間成班同事熄晒全公司嘅燈，圍埋一齊睇鬼片，為忙碌嘅一日帶嚟一啲娛樂。

細心老闆支持超彈性工時

Easy Line Up企業文化年青，全公司嘅平均年齡係25歲。Ken話：「公司管理層善解人意，明白年輕人嘅需要，唔會死板規定每星期返幾多日工。同埋只要預早通知，管理層亦會容許較大彈性嘅上班時間，為我帶嚟極大嘅方便。」另外，公司仲會為一啲熟手嘅兼職員工提供在家工作嘅選擇添呀。

修讀公關嘅阿Ken覺得Easy Line Up嘅工作同自己嘅學業好大關係，並對日後搵工好有幫助：「入職以嚟，我除咗對呢行有更大認知之外，我覺得對將來投身社會都有好大嘅幫助。大勢所趨，各行各業都想透過 social media同KOL宣傳自己嘅品牌。我喺呢度累積嘅經驗對我將來無論喺咩行業工作都一定有好大嘅益處。」

入行無需經驗 只要有心有興趣

講到入職要求，CK就話無相關工作經驗完全唔係問題，因為公司會提供在職培訓，亦會比員工由淺入深慢慢做上去。例如一開始會學習物色新嘅KOL；然後做熟咗就學寫profile，甚至向客戶推薦合適嘅人選等，一切都係逐步循序漸進嘅。

公司最主要希望請到一啲本身對 social media例如Instagram、Facebook同Youtube內容有興趣嘅有心人，因為想兼職同事都可以一齊參與提名人選嘅過程。另外公司最著重嘅就係員工嘅溝通能力同責任感，希望員工有效率同埋靈活變通。

「我哋呢行好多時有新事情發生。例如不斷有好似IG stories, IG TV, YouTube首播或Facebook首播等等嘅新功能。我哋都要去嘗試同思考點樣可以幫客戶運用唔同嘅功能以達至最佳嘅宣傳效果。我哋一定要靈活咁跟住個市場走，唔能夠原地踏步。」

遍佈亞洲9個地區嘅Easy Line Up而加招聘緊多個兼職職位。對KOL相關工作有興趣、鍾意彈性工時、同時又自認溝通能力及責任感強嘅你，快啲把握機會喇！另外，如果識日文或韓文，仲有機會同當地嘅網紅合作添呀！