【職場見工黑名單】見工畀人reference check？

黑名單嘅作用

顧名思義就係提醒下一個HR同事唔好請錯人啦。

係咪每收到一封求職信都會睇黑名單？

係嘅話HR同事應該好忙！其實好多時，喺HR想請你之前做reference check嘅時候，你之前嘅公司就會查閱呢份黑名單，睇吓呢位人兄係咪請得過。HR多數會問一條好間接又到位嘅問題：「你會唔會rehire（重新僱用）佢？」呢個問題前公司HR點答，就好在乎你有無榜上有名喇！

黑名單內容係咩？

除咗同事嘅中英文姓名之外，黑名單內容每間公司都有啲唔同。有啲就簡單到淨係得名同聘請同離職日期，直接了當地代表你一上榜嘅話就永不錄用喇！有啲就會寫埋你衰咩、有無受過記錄處分、時間、日期、當時直屬上司係邊個等等。

令人上榜嘅罪行係啲乜？

集合咁多HR嘅意見，以下呢啲係最常見嘅：

• 偷公司嘢

• 無故唔返工

• 用假病假紙

• 滋擾同事、行為不檢

• 工作態度極度惡劣

• 做啲危害公司利益嘅事

• 喺無申報之下，打兩份工

係咪一榜上有名就永不超生？

又唔一定，其實好睇你好唔好彩： 成日聽朋友講而加請人好難。所以如果咁啱新公司真係好等人用，佢都會考慮比機會你，又比機會自己搏一搏。 如果請你嘅HR大量又有愛心，都會比一個重生嘅機會你。問世間誰無過錯呢？ 當然，榜上有名嘅話被錄取嘅機會一定細好多啦！如果唔係要條黑名單嚟裝飾咩？所以大家做好自己本份，準時返工（同放工！）咪唔駛怕囉！