純粹筍工
靠瞓覺搵錢大家可能有聽過。但係免費揸跑車、坐遊艇同私人飛機去私人度假村嘆世界都可以搵錢，又有冇可能呢？英國奢侈品牌網站Hush Hush最近就公開請奢侈品測試員，主要職責就係幫公司試唔同嘅奢侈品，測試佢哋嘅款式、舒適程度、性能等等，然後為每件產品寫份詳細嘅報告。呢個網站上面最貴嘅產品包括價值港幣億億聲嘅私人渡假村、珠寶名錶、遊艇等等，係咪聽到都想即刻申請呢？
呢份工嘅條件超簡單：要熱愛旅遊、藝術、時裝，同埋份人要細膩，並且對奢侈品獨具慧眼就得咖喇！性格方面，由於呢個職位嘅人要同suppliers溝通，所以要能夠獨立處事、識交際應酬、出得大場面。如果你鍾意去旅行就啱晒啦，因為呢份工要經常出差，去試佢哋唔同嘅私人島嶼度假村同埋私人物業。
其實除咗呢份工之外，小編都睇到唔同地方都有啲好有趣嘅工種，等我同大家分享下5大奇工啦：
1）職位：專業暖床員
地方：英國 公司：Holiday Inn 工作範疇：喺客人嘅要求下，著上成套抓毛絨衫，趁客人返房之前幫佢整暖張床。暖床員仲會有支溫度計，確保張床係攝氏20度呢。
2) 職位：水上滑梯測試員
地方：希臘、美國、土耳其等各地 公司：SplashWorld Resort 工作範疇：勁玩水上滑梯，試水質、速度、滑梯高度等，確保安全同好玩。
3）職位：島嶼保育員
地方：澳洲 公司：Tourism Queensland 工作範疇：喺島上面玩、同海龜游水、潛水、同當地人做朋友、享受昆士蘭嘅生活同氣候，然後影相寫blog。
4）職位：專業瞓覺員
地方：香港 公司：香港大學 工作範疇：填寫睡眠日記同戴上腕動計、提供睡眠資料，之後要進行訪談、問卷同埋電腦習作，甚至有機會喺港大嘅睡眠實驗室入面小睡。
5）職位：道德黑客 (Ethical Hacker)
地方：世界各地 公司：Google、Apple、Adobe等大公司 工作範疇：有道德地Hack，睇返網上/公司嘅system有咩漏洞，幫公司預防被Hack。
