疫情中學會的5件事
新型冠狀病毒（武漢肺炎）對全世界都有好大形響，口罩、在家工作、在家隔離突然變成大家每日討論嘅話題。呢個疫症令經濟大受損失，好多人被減薪、放無薪假，甚至被裁員。呢個突如其來嘅風浪，相信為大家帶來好多反思及學習。
1.儲錢
成日都話要喺銀行戶口儲定半年嘅生活費，以備不時之需。不過香港百物騰貴，要儲半年生活費的確唔容易做到。如果不幸失業，平時又做開月光族，食、住、燈油火蠟全部都係錢，必然會面對巨大嘅生活壓力。當危機出現嘅時候就真正感受到儲錢嘅重要性及必要性。疫症過後，真係要坐言起行，培養定期儲蓄嘅習慣，積穀防饑。
2.要擁有多於一種技能
一個疫症，令多個行業受影響，呢個時候先明白到世界上係無鐵飯碗。惟有不斷增值自己，擁有多於一種謀生技能，先可以避免被市場淘汰嘅命運。如果一行沒落，都可以靠自己其他技能謀生，起碼可以幫助燃眉之急，暫時照顧到生活必需要嘅開支。
3.人際關係的重要性
正所謂出外靠朋友，市場上好多職位空缺都唔會公開招聘，都係熟人介紹。一嚟公司可能急住請人，二嚟如果老世或者人力資源部門嘅同事原本已經好滿意介紹人嘅工作表現，佢地都會偏向信任介紹人朋友嘅工作能力。如果畀人炒咗，想即時有工開，呢個時候就表現到人際關係嘅重要性。
4.計劃趕不上變化
好多打工仔可能喺2019年都有諗過，過咗個新年，拎埋份花紅就打算轉工。不過新年期間，情況已經一百八十度改變，而家有份工做，可以支撐基本生活所需已經好滿足。有部份人就算已經計劃好旅行或者結婚，通通都要延遲或取消。計劃永遠趕不上變化，面對現實嘅多變，思想及心態都必需作出調節。
5.幸福非必然
當每日都要帶口罩、日常生活要保持社交距離、所有懷疑確診個案都要被隔離十四天、限聚令、好多主要社交場所被迫關閉，日常生活好多平時覺得係理所當然嘅野都變成奢侈品。透過今次嘅經驗，相信大家都學會幸福及健康都非必然，要時刻注意個人及家居衛生，擁有健康身體嘅重要性。