家用有冇公價?月入15,000,家用畀幾多成先至好?
![家用有冇公價?月入15,000,家用畀幾多成先至好? 家用有冇公價?月入15,000,家用畀幾多成先至好?](https://assets-content.moovup.com/images/月入1.5萬,畀唔畀家用好?.png)
畀家用應該畀幾多,大家都有唔同嘅意見。坊間公價係由$1000-$6000不等,係介乎子女人工嘅10-40%。
喺華人社會,畀 家用係一種責任、孝順同尊重父母嘅表現。父母供書教學多年,有人覺得畀家用係天公地道,有人覺得係隨心,畀 唔畀 都唔重要。香港地乜都貴,食飯、燈油火蠟、各樣雜費、屋租乜都係錢,同屋企人住的確可以慳唔少錢。 好多人成日羨慕西方國家無畀 家用嘅概念,父母唔會期望子女照顧,自給自足。但係另一方面,當子女18歲成年之後,父母養育子女嘅責任就己經完成。子女開始經濟獨立,需要自己搬出嚟住,如果想讀大學都要用自己名義向政府借錢,零用錢更加係唔會有。 如果子女出嚟做野之後仲係同父母一齊住,佢地係需要俾租金,並支付部分水電煤雜費,而食物都需要自己支付返,佢地唔叫呢啲做家用,而係好似同朋友夾租一樣計法。 如果照咁講,喺香港同父母同住嘅仔女,就算唔俾家用「孝順」父母。係咪都應該參考西方國家嘅做法,支付屋企部份嘅開支呢?當然大家嘅社會文化、物價同樓價都唔同,唔能夠完全同外國嘅做法相提並論。
![在香港生活各種費用都需要計足,即使與屋企人同住亦要考慮俾家用的問題](https://assets-content.moovup.com/images/%E7%94%9F%E6%B4%BB-%E8%B2%BB%E7%94%A8-%E8%A8%88%E7%AE%97-%E4%BF%BE%E5%AE%B6%E7%94%A8.jpg)
養育子女係追求投資回報?
有部分父母覺得養育子女需要等價交換,追求投資回報,有養兒防老嘅觀念。香港生活艱難,樣樣嘢都貴。子女應付自己嘅基本開支,儲到幾千蚊都所剩無幾。子女都要為自己未來著想,先唔好諗儲錢買樓,最起碼每個月儲少少錢,如果有咩突發事情發生嘅時候都有錢傍身。如果將剩底嘅錢都用嚟俾家用,對子女未來嘅發展都有好多限制。 養兒防老嘅觀念真係未必適用於今時今日。
![夫婦之間除了規劃自己的人生外還要考慮養育子女的問題](https://assets-content.moovup.com/images/%E4%BA%BA%E7%94%9F%E8%A6%8F%E5%8A%83-%E9%A4%8A%E5%85%92%E9%98%B2%E8%80%81.jpg)
平衡期望與實際經濟能力
根據銀行退休策劃指標,單身人士嘅基本生活需要係HK$6985,而兩個人就需要HK$11795。假設父母己經擁有自己嘅物業,如果一個人每日只可以用HK$197-$233,只係啱啱夠基本生活,唔計食飯、交通同其他雜費,去旅行絕對唔係可負擔範圍之內。喺香港物價同樓價都貴,如果賺得少錢,顧得自己又顧唔到父母,有時真係有心無力。親子雙方最重要應該多溝通,究竟應該畀幾多家用呢個問題,其實只要盡量平衡父母嘅期望同子女嘅實際經濟能力,大家商討出一個合理嘅金額,咁就大家都開心啦。
![子女應該多花時間了解父母的需要及溝通以平衡父母希望得到的家用及子女的實際經濟狀況](https://assets-content.moovup.com/images/%E6%99%82%E9%96%93-%E7%B6%93%E6%BF%9F%E7%8B%80%E6%B3%81-%E5%B9%B3%E8%A1%A1.jpg)