【全職媽媽做兼職】七大熱門兼職工作選擇
喺香港做全職媽媽的確唔容易，每日由朝到晚全天候照顧小朋友，又要打理家頭細務，真係唔容易。小朋友開始返學，媽咪終於有返啲空餘時間可以做啲照顧小朋友同家庭以外嘅野。做兼職唔單止可以幫補家計，又唔會同個社會脫節，真係一舉兩得。部分全職媽媽可能會擔心自己無其他求職者咁有市場競爭力。但係其實全職媽媽搵工都好有優勢，好多僱主都會覺得全職媽媽比較有社會經驗，識得待人接物同可靠。點樣先可以喺家庭同事業之間作出平衡？搵兼職之前又有啲咩需要考慮？想輕輕鬆鬆返一日半日工？其實都有好多選擇。
1.神秘顧客 - 每次薪金$150-$300（部份公司會津貼$30-$80交通費）
為左提供優質嘅顧客服務，提高消費體驗質素。唔少企業都會僱用神秘顧客去調查及評核職員嘅服務態度同對產品知識係咪符合公司標準。神秘顧客會扮成一般顧客去執行調查任務，譬如購買產品、查詢服務或用膳等。神秘顧客會按企業嘅工作流程及服務標準對職員評分。具體及客觀地記錄整個過程（包括：店舖環境、員工服務、銷售技巧、以及提供改善方案），並且整個過程都會以錄音紀錄。
神秘顧客每次探訪通常都係大概30分鐘至一個半鐘，之後填寫報告或簡單問卷總結消費體驗。完成一次神秘顧客任務都已經有唔錯嘅收入，仲可能有交通津貼，係唔錯嘅筍工。
2.) 補習老師，畫畫、樂器、興趣班老師 - 時薪$100-$300 不等
多才多藝嘅媽媽可以用自己嘅專長同知識教育學生。市面上唔止需要補習同樂器老師，其他興趣班，例如整手作或整蛋糕都好受歡迎，其實市面場上有好多林林總總嘅興趣班職位，梗有一樣啱你做。補習同興趣班老師都有分兩種：學習中心任教或私人教授。喺學習中心教就比較隱定，返工都係喺同一個地點，又唔需要自己搵學生同比較少突發取消課堂嘅情况出現。私人教授嘅時薪通常都較學習中心嘅時薪高一至兩倍，返工時間比較短，但時間會比較彈性。
3.) 售貨員 - 時薪 $50-$70
講到時薪高又唔太辛苦就一定係做售貨員。工作範圍包括有檢查、整理貨品、銷售、收銀、試衣間接待、清潔店舖等有關工作。如果媽媽一星期可以返兩次半日或全日，呢個係唔錯嘅選擇。如果只可以返一日半日，受聘嘅機會會比較低。
4.) 戲院服務員 - 時薪 $40-$50
喺戲院工作有幾個崗位都可以考慮，例如售票員、製作及售賣食品同帶位工作。工作內容簡單，環境又唔錯。除左份人工，仲有唔少員工福利，例如免費電影贈券、小賣部折扣優惠，指定假日(聖誕及新年)上班津貼。一星期最少只需要返兩次半日或全日。
5.) 收銀員 - 時薪 $40-$60
各大百貨公司，便利店同超級市場長期都需要兼職收銀員，梗有一間喺左近。工作範圍一般包括係處理店舖現金交易、埋數事宜、主動向客人介紹最新產品優惠資訊、推廣活動、接聽電話及協助店舖日常運作。唔需要體力勞動，係一個唔錯嘅選擇。
6.) 侍應 - 時薪 $50-$65
侍應工作通常較容易申請，無需經驗，可以慳返食飯錢又唔洗自己煮。工作內容主要係介紹菜單、落單、上菜傳菜及負責保持店面環境乾淨衛生。手板眼見功夫，簡簡單單又一日。
7.) 網上調查問卷 - 每份問卷 $10-$50或購物禮卷
如果想安坐家中，一邊照顧小朋友一邊工作，可以考慮做網上調查問卷。其實有好多網站都有提供免費登記做網上調查問卷。每份問卷大概需要答幾十條問題就可以賺$10-$50不等或者賺取購物禮券。
兼職嘅時薪差距可以好大，由$40-$300不等。全職媽媽選擇工作嘅時候要考慮工作地點、工作性質、時薪同上班時間。市面上有好多兼職都好適合全職媽媽，可以同時工作及配合照顧小朋友同家人。如果想輕鬆返一至兩日工，以上嘅工種都係唔錯既選擇。