【髮型屋學徒】入行方法、Salon人工及前景2021

髮型師入行故事

Yashi中學畢業之後就乜都做，裝修冷氣、日本料理乜都做過。從工作中，佢慢慢發掘到自己鐘意有趣、多元化及關於扮靚嘅工作，咁啱睇報紙見到請酒店髮型助理，一入行就十四年。十幾年前一般文職都有$7000-$8000起薪點，做Salon入行月薪只有$3000-$4000。日日起碼做十個鐘，無OT錢，午餐、晚飯休息時間加埋只有十分鐘。所有清潔，包括洗廁所都係由學徒一手包辦，工作非常艱苦。

髮型屋學徒入行要求、途徑及見工貼士

髮型屋學徒（助理）入行門檻唔高，無乜特別學歷及工作經驗要求，年紀方面亦都冇乜特別規限。如果有興趣入行，你可以由朋友介紹、Facebook、論壇群組、walk-in或者求職網站都可以搵到。見工嘅時候唔需要特別打扮，無需標奇立異，着返平時出街衫，帶一支筆就可以。最重要嘅係比人感覺到你真係好有心去學一個技能。

髮型行業四大晉升階段

髮型行業分別有學徒、技術員、髮型師、老世呢四個階段。做學徒入職人工通常都係$12,000至$13,000不等，主要負責提供洗頭服務、協助髮型師日常工作需要及一般場地清潔。技術人員人工大概有$15,000至$16,000不等，主要負責染髮及電髮。髮型師通常都係無底薪又或者只有頭三個月大概$10,000嘅底薪。髮型師屬於自僱人士，以拆賬模式同髮型屋合作，髮型師大概可以賺取四至七成嘅利潤，多勞多得，上班時間比較自由。有一定嘅年資及資金之後，好多髮型師都會選擇同幾個朋友夾錢開自己嘅髮型屋。 視乎個人能力，每一個升職階段大嘅係一至三年，髮型師會不定時考核學徒或技術人員嘅技術，例如要求創作一個染髮或電髮作品，如果通過考核就可以升職，快則四五年就可以由學徒升到做髮型師。髮型呢個行業係以自學嘅形式學習。邊睇邊學，唔會有人拎住你隻手教你剪頭髮，要多問，多練習，例如用公仔或約朋友練習整頭髮。利用放工時間上髮型設計進修課程、睇片、睇書自學。

都市傳說 -「做洗頭仔好辛苦，會洗爛手。」

無錯！因為學徒每日都需要為客人提供洗頭服務，全日都需要掂水及接觸染髮、電髮化學物料，雙手好容易變得粗糙、甩皮甚至有爛手嘅情況。呢個係一個必經嘅階段，都可以話係唯一最辛苦嘅地方。但係對比以前，而家做學徒就舒服得多，一入職就有$12,000至$13,000不等，唔洗OT、洗廁所，主要負責洗頭、協助髮型師日常工作需要及清潔場地，仲好過做文職。

如何於髮型行業建立及發展事業

從事髮型行業必需建立熟客群及頭髮造型作品。雖然學徒及技術員開初都係以免費形式搵朋友或者Model練習整頭。從呢個階段其實已經要開始建立口碑，當自己升做師傅嘅時候，佢地就會成為你嘅客群。可見建立熟客群係一條好漫長嘅道路。如果有心做師傅或者老闆，更需要學習市場推廣及人力管理嘅知識。要成功就要用心經營自己嘅作品、不斷學習、進修及練習。髮型行業其實好有趣，當你每日同唔同背景嘅人相處，除咗可以提升溝通技巧，更可以從客人身上學到各行各業嘅知識，擴闊你嘅眼界。