【理財儲蓄】7大日常慳錢大法2021
一個疫情令我地體會到，穩定收入唔係必然及積穀防饑嘅重要性。如果賺得多洗得多，其實賺幾多都無用。唔想手停口停、成世做月光族，就要學識精打細算及開源節流。要有儲錢習慣，避免用信用咭呢啲入門版慳錢大法大家都已經聽過。不如挑戰下慳錢大法進階版。
1.停用八達通自動增值服務
雖然八達通只可以進行小額消費，不過如果你張八達通連接左張信用咭，有自動增值功能，八達通就會變成一張迷你信用咭，一樣係鼓勵衝動性消費。唔想亂洗錢？由今日開始停用八達通自動增值服務啦。
2.多用大額鈔票
根據美國《消費者研究期刊》嘅一項研究顯示，如果我地同時擁有一張100美金同5張20美金，我地會更容易用咗5張20美元。因為人會覺得一大堆小額鈔票唔係重要嘅現金，而大額鈔票就係特別款項。所以當用大額鈔票嘅時候會比較緊慎。任何會幫助你喺消費之前，多花時間思考嘅方法，都會幫助你更理性消費。如果你已經戒咗用信用咭，不妨試下呢個進階版方法，幫助自己更理性消費。
3.設定財務預算
想設立一個長久嘅儲蓄習慣。首先，我地要衡量自己有幾多收入，然後設定一個可實行嘅財務預算計劃。我地可以由最簡單嘅80/20分配法則（80%支出20%儲蓄）或者50/30/20分配法則（50%必要支出30%非必要支出20%儲蓄投資）入手，將儲蓄及消費之間作出合理安排及調整。只要持之以恒，唔好隨意使用或調動金錢。一年半載之後你就會發現長期累積嘅力量及成果。
4.增加定期儲蓄及投資金額
除左節流之餘，開源更為重要。想放棄做月光族，就要由儲蓄及投資開始。市面上有好多比較低風險嘅儲蓄及投資計劃，只要衡量自己嘅風險承受能力，習慣撥開一部份嘅人工去做儲蓄及投資計劃，絕對係一個理財好開始。
5.免費運動
有好多人申請一年甚至幾年嘅健身會藉都唔係成日用，甚至完全唔會用。其實Youtube有好多唔同類型嘅運動視頻不斷更新、任君選擇，只要有部電腦或者電話就可以任何時候都做到運動。鐘意戶外運動亦可以選擇行山、去沙灘游水或者使用康樂及文化事務署提供嘅戶外免費健身設施。下次買健身會藉之前要三思以後行，如果自己真係唔需要個會藉就不如直接取消。
6.善用政府免費資源
娛樂節目唔一定要花費好多錢。我地可以喺圖書館借書及DVD取代買書、畀Netflix月費及去戲院睇戲。鐘意做運動嘅，可以預訂康樂及文化事務署嘅免費設施，例如：硬地足球、籃球、手球、排球場、門球場及滾軸溜冰場等。另外，如果想進修亦可以申請政府提供嘅二萬蚊持續進修基金。只要善用政府免費資源，又可以慳返一筆。
7.更換電訊服務供應商
通常手機或家用互聯網供應都要你簽兩年約，如果你願意花多啲時間周圍格下價，搵一個啱你又最抵嘅供應商，其實呢度慳啲嗰度慳啲，就可以慳返好多錢。
伸延閱讀：