【無薪假】No pay leave 期間做兼職會否觸犯僱傭條例？
市道唔好，周圍都減薪、推行無薪假，甚至裁員。其實就算放緊無薪假都唔等於係絕路，有好多地方都請緊兼職，可以喺非常時期，幫助大家渡過燃眉之急。
無薪假期間可否做兼職？ 《僱傭條例》無特別列名無薪假期間可唔可以做兼職，不過部份僱傭合約就限制咗員工兼職或從事其他職業嘅權利。僱員喺被停工嘅時候，可以嘗試要求僱主放寬相關條款，讓僱員從事其他崗位。保障自己放無薪假時仍可兼職增加收入，放緊無薪假嘅求職者可以考慮以下四個行業：
1.餐飲業及零售業 受疫情影響，少咗人出去食飯，就多咗人叫外賣或者自己煮。所以超級市場收銀員、店務助理、外賣員等職位嘅需求都大咗。有部份工作更無需經驗，而且人工都唔錯，大概有$40-$65/小時。
2.物流及運輸業 少咗人出街買嘢，反而更多人上網購物。理貨員、送件員、倉務員嘅職位都隨之增加。如果你識揸車仲可以做司機送件員，人工有機會更高。呢類型嘅工作時薪大概有$40-$80，入行門㩜低，值得考慮。
3.清潔 疫情期間，為確保公共衞生，各大酒店、商場、辦公室及私人屋苑都加強清潔及消毒工作。周圍都請緊清潔員，有啲每日只需要做2-3個鐘，時薪介乎$45-$80+。不妨喺屋企附近搵呢類型嘅工作，每日做幾個鐘，搵下外快都係一個唔錯嘅選擇。
4.補習及興趣班導師 停課一度延遲，不過停課不停學，補習、及興趣班導師都係仲有市場。有啲中介平台會收取部份補習中介費用，例如頭兩個星期嘅學費作為介紹費。不過喺Moovup申請工作係費用全免。時薪都好吸引，介乎$50-$250。