【斷捨離】教你5步建立簡單生活2021
又到年尾啦，唔夠一個月就踏入新嘅一年。除左欣賞自己一年嘅努力，不如學下日本嘅斷捨離生活態度，幫心靈及工作地方大掃除，迎接新一年。斷捨離嘅概念就係只需要以「自己」而唔係「物品」為主角，去思考乜野「最適合現在嘅自己」以及「讓自己感到最愉快也最常用」？日本整理女王近藤麻理惠以獨特嘅「怦然心動」整理方法著名，捨棄物品嘅時候，除左問自己需唔需要，最重要嘅係件物品有無令你心動嘅感覺。如果無就可以同佢講再見。實踐「斷捨離」有以下五步曲。
第一步：定立理想工作環境目標
幻想自己心目中嘅理想工作環境，可以幫助自己有更多動力實行斷捨離，創造一個自己鐘意嘅環境。
第二步：收集想丟棄嘅物品
將所有物件拎曬出黎，每件過目一次，將所有想丟棄嘅物品分類放埋一邊。
第三步：搵出「怦然心動」嘅物品
然後將唔捨得丟棄嘅物品每件再過濾一次，然後問自己嗰件物件有無令自己「怦然心動」。喺呢個過程，你必需對自己誠實，如果嗰件物品無為你帶黎快樂，又或者你只係覺得你將來有可能會用到，就可以將佢放去丟棄物品類。
第四步：感謝並丟掉
然後，你可以去處理丟棄物品類，花啲時間感謝每件物件為你帶黎嘅快樂及美好回億，然後丟棄。呢一個動作唔止係幫你慳位，掉左一件物品，更重要嘅係可以幫助你放下過去，只留低最適合現在嘅自己以及讓自己感到最愉快也最常用嘅物件。
第五步：整理收納，物歸原位
收拾所有精選及令你心動嘅物品，你就可以將佢地收好，放返原位。 除左物品之外，工作、人際網絡及感情都可以用同一個理論去實行斷捨離。新一年之前，一齊做心靈大掃除啦。
