【大學生見工面試】5大面試前準備事項
根據大學聯校就業資料統計庫（JIJIS）數據顯示，今年1月至3月份全職畢業職位空缺數目有12,217份，比往年減少近四成。而薪酬方面，較去年同期增加近11%，平均薪酬為17,592元。而今年1月至3月空缺最多的首三個行業為資訊科技、工程、銀行或金融服務。既然少咗職位空缺，畢業生想搵到心儀嘅工作，就更加要做好準備。
1.預算交通時間 守時係基本禮貌，亦都表示你重視份工及時間管理做得好。見工之前要搵好路線圖，最好先去一次公司附近、預計交通時間。見工當日預留更多時間搭車，咁就唔會怕遲到。
2.搜集面試官資料 可以用Linkedin或Google了解面試官及將來有機會成為你直屬上司嘅背景，藉此更加深入了解該職位空缺嘅實際工作內容及公司嘅往跡，可以幫助你做好心理準備及面試前嘅準備功夫。
3.做足準備功夫 見工其實就係推銷自己，面試之前要做好資料搜集，了解公司業務、背景及信念。畀僱主感覺到你真係有付出時間做足功課，從態度上表達出你好有誠意加入公司。雖然僱主喺見你之前已經睇過你份CV，對你有基本認 識。喺自我介紹嘅時侯除咗簡單總結你份CV，你仲可以講比僱主知道你之前嘅工作及學校活動學到嘅經驗可以點樣直接為公司帶來貢獻。
4.舉例證明工作能力 引用自己生活中嘅例子或者工作經驗去證明自己嘅能力。例如你係咪一個有團隊精神嘅人？呢一題可以用日常生活做例子，例如運動隊、慈善機構以及學術作業等。你可以喺呢條問題上主要講述你同其他人合作嘅過 . 程，例如，你點樣參與團隊合作、傾聽其他人嘅想法，並最終達成目標的。
5.表示對該崗位的誠意 喺面試結尾，面試官通常都會有個畀你問問題嘅時間。你可以一早預備幾條同工作有關嘅問題，而之前無提及過的，例如，工作內容細節、公司發展方向等。表現自己認真對待今次嘅面試機會、工作崗位及好期待加入公 司。 要帶咩去面試？
- 身分證
- 原子筆
- 履歷表正副本 - 學歷文件 ／ 證書正副本
- 工作證明文件正副本 (如有，例如公司推薦信)
- 證件相
- 手提電話