【公眾假期】對比全世界最多公眾假期國家排行榜

好多人以為越文明嘅國家會越多公眾假期，估唔到柬埔寨竟然居榜首。而第二、第三嘅都唔係發展蓬勃嘅國家。其實公眾假期好多時係紀念一啲重要嘅日子、憲法。而柬埔寨嘅公眾假期好多都佢哋信奉嘅宗教有關咖！就好似我哋嘅佛誕呀、復活節呀咁。

另一邊廂，亦有人話越先進越發達嘅國家先至會少啲公眾假期，因為國家多咗自由，少咗宗教等嘅約束，亦因為咁，呢啲國家嘅公司嘅年假就會多返。睇下美國，雖然佢哋公眾假期數量連頭十名都無份，但係好多喺美國做嘢嘅朋友都話佢哋啲年假閒閒地都兩、三星期嘅。恨死隔嚟喇！

睇返香港，當我哋有時喺度怨點解初三喺星期日又無得補假嘅時候，原來我哋嘅公眾假期（17日）係全球第五位咖！我哋嘅朋友新加坡都係得11日咋！所以幾時都話，香港係一片福地啦！鍾意搏殺搵食嘅朋友，好多機會喺紅日返工攞雙糧呢！

排名	國家	公眾假期日數
1	柬埔寨	28
2	斯里蘭卡	25
3	印度，哈薩克斯坦	21
4	哥倫比亞、菲律賓、千里達和多巴哥 ( 位於中美洲加勒比海南部、緊鄰委內瑞拉外海的島國)	18
5	中國、香港	17
6	泰國、土耳其、巴基斯坦	16
7	日本、馬來西亞、阿根廷、立陶宛、瑞典	15
8	印尼、智利、斯洛伐克	14
9	南韓、奧地利、比利時、挪威、台灣、尼泊爾	13
10	芬蘭、俄羅斯	12
11	新加坡、意大利、丹麥、法國、阿聯酋、摩洛哥、捷克共和國、盧森堡	11