【MDRT2021】MDRT百萬圓桌會員資格、收入、好處？ 27歲MDRT分享做保險年薪百萬秘訣
各大保險公司每年都會喺港鐵站及各大報紙登廣告，表揚保險業界從業員成為MDRT百萬圓桌會員。因為疫情關係，經濟下滑、失業率增加，同時，2021年嘅全球業績要求都比往年底，因此吸引到更多人入行保險行業。究竟咩係MDRT百萬圓桌協會？做MDRT百萬圓桌會員要咩資格、收入要求及有咩好處？ 連任2年MDRT嘅Vivan會為大家解答以上問題。
保險入行故事 – 從做兼職日文翻譯員到做保險MDRT百萬圓桌會員，搵百萬年薪
Vivian 大學畢業之後做咗四年兼職日文翻譯員，月入$8500至$15,000，同屋企人住，生活過得好自在。不過屋企人總係覺得佢唔夠踏實，為咗唔想令屋企人擔心，Vivian 決定轉做全職文職工作，經朋友介紹做保險總監秘書。Vivian 用咗一年時間觀察保險界，發覺保險業其實非常專業，工作內容主要都係關於人生規劃及財務管理，收入亦非常可觀。Vivian 唔甘心每個月只有$13,000人工，一直用時間換取金錢。佢想生活質素提升，並用專業及技能創造財富。所以佢決定由保險總監秘書轉做agent（保險經紀），並用一年時間及努力晉身 MDRT百萬圓桌協會 ， 27歲賺佢人生第一個一百萬。今年亦連任MDRT會員及連續兩年被公司委任為MDRT Ambassasor（百萬圓桌大使），向內外推廣百萬圓桌MDRT文化和使命。
咩係MDRT百萬圓桌協會？
MDRT百萬圓桌協會 係一個人壽、保險及金融服務界嘅獨立國際組織。MDRT百萬圓桌會會員係全世界人壽、保險及金融服務業嘅卓越指標。MDRT會員需要符合指定佣金業績、專業知識、道德操守及客戶服務要求。MDRT分為三個級別，會員MDRT(Million Dollar Round Table) 、超級會員COT(Court of Table)及頂尖會員TOT(Top of Table)。
MDRT百萬圓桌資格／MDRT收入？
因為保單佣金係根據保險費用計算出嚟，而每個國家嘅保險費用就跟據當地人嘅人口、病發率、出生率、死亡率等而定立。 因此，每個國家嘅佣金業績要求都唔一樣。MDRT百萬圓桌協會每年都會調整入會業績要求，以下係2021年香港MDRT入會最新規定：
- 會員MDRT(Million Dollar Round Table) 佣金要達$409,800，有效保費709,700；
- 超級會員COT(Court of Table)業職佣金須達1,229,400，有效保費2,129,100；
- 頂尖會員TOT(Top of Table)佣金須達$2,458,800，有效保費$4,258,200。
MDRT會員準則 – 行貨價VS水貨價
做MDRT會員都有分行貨價及水貨價。MDRT行貨價就係百萬圓桌協會每年公佈嘅標準業績數字。而每間保險公司嘅計法都唔同，所以就有MDRT水貨價嘅存在。保險經紀可以用個人佣金或個人及保險經紀屬下團隊佣金總和申請做MDRT會員，以合人佣金申請就需要達到$409,800先可以成為MDRT會員。如果係以個人業績加屬下團隊佣金總和申請，個人業績只需要達到$200,000以上，而保險經紀屬下團隊業績就要做到$900,000以上。
MDRT好處？
MDRT百萬圓桌協會會員可以參加MDRT年會 、 頂尖會員年會 、 百萬圓桌體驗全球大會 與全世界MDRT會員進行交流，交換心得。年會多數都係喺歐美加舉辦，需要自費，不過部分香港保險公司都會贊助保險經紀參加交流。同時，MDRT會員都可以獲得定期百萬圓桌協會月刊及喺網上睇歷屆百萬圓桌年會 影片及演講 ，幫助MDRT會員提升專業及激發業務增長。
保險公司內部MDRT會員額外福利：
雖然保險經紀係自僱人士，不過 Vivian 所屬嘅保險公司會為MDRT百萬圓桌會員安排團體醫療保險（Group Medical Insurance ）及繳付MDRT會員年會費用（美金$550），作為獎賞。另外，保險公司仲會提供會員免租泊車位津貼及額外獎金。
客戶服務額外福利：
所有MDRT百萬圓桌會會員嘅客戶都可以享有特別待遇，例如客戶索償部份保險時，可以免身體檢查證明及享有更好嘅核保待遇。另外，所有MDRT百萬圓桌會會員都擁有保險公司優先專屬熱線，客戶可以享有更好更快嘅待遇、優先處理保單。
MDRT分享年薪百萬秘訣
連續兩年做到MDRT嘅 Vivian 一定有自己嘅過人之處。 Vivian 話入保險行業，想有百萬年薪，最緊要夠「想」，要清楚自己點解入行做保險。保險前輩成日都講：「做保險第一年成功的話係睇你過往累積嘅人緣，第二年係講你勤唔勤力，第三年往後就講實力。」假設你有50個朋友都樂意同你買保險，不過你唔夠「想」而無主動逐個去傾，到最尾有客都唔會有保單。所以，要時常記住，信念、行為、結果係互相相連。
MDRT的工作日常
保險經紀係自僱人士，想成功賺百萬年薪唔可以漫無目的。Vivian 每朝都會準時9：15a.m.返到公司開會，同保險團隊互相分享業績進度及公司產品最新消息。晏晝就會做客戶跟進服務，例如客戶保單文書跟進、去醫院探病、招募新保險經紀、喺Facebook、Instagram、Wechat關注客人近况並送上關心、如果客人生日、公司開張、新居入伙等；Vivian 都會送上小禮物或約食飯等。夜晚就會同客人食飯傾保單。每日都要做到「399」呢個目標，3個預約、9次街上搭訕識新朋友及聯絡9個新客戶。
MDRT衣著
專業行業都講究外型，Vivian 主張簡約大方嘅衣著打扮。男女都要留意髮型、手指甲、鞋款、手袋大小、香水甚至用咩手機殼都要注重，必需保持儀容整潔（建議女生點都化個淡妝）。名牌靚衫貴錶可以有，但切忌全副身家著上身；大方謙虛，望落都順眼啲。
MDRT心態／工作態度
要做MDRT搵潛在保險客戶或招募新保險經紀方法有好多，例如擺Road show（街站）、派傳單、cold call、參加唔同類型嘅活動識新朋友、管理網上Marketing，喺Facebook、Instagram、Wechat宣傳自己及保險新產品。
有好多保險經紀都會有兩部電話，一部公司用一部私人用，將工作及私人生活分開。Vivian 就唔認同呢個做法，反而將工作變成自己生活一部份，看待客戶如朋友，而非生財工具。另外，要用心跟進每一個潛在保險客戶或保險經紀，時常保持良好職業操守，用心解釋保單細節及條款，絕不過度承諾保單保障範圍。當你做齊以上事情，到最後得到潛在保險客戶介紹朋友幫你簽保單或入行做保險經紀都係一件好自然嘅事。
如果想了解更多保險資訊歡迎直接聯絡Vivian 。
伸延閱讀：