Freelancer需要具備的五個條件

1.受壓能力高

身兼多職，好容易會撞deadline。尤其是遇上工作堆積如山嘅高峰期，就算時間管理做得好好，都可能會有應付不暇嘅時侯。有時一次嘅失敗就會與永不錄用劃上等號，所以壓力大係理所當然。有時仲要早午晚去三個地方做三份工，一份接一份，成日要走黎走去，都會好容易令你身心疲累。喺啖季嘅時侯又可能要經歷長時間無收入，經濟及心理壓力都唔少。

2. 理解能力及認變能力高

一份朝9晚5嘅工作通常只需要向一個上司及老世報告。每日對住同一班同事共事，只要花少少時間建立默契，工作應該唔難應付。但喺freelancer就好唔同喇，做freelance好多時都係一次性嘅工作，一次嘅失誤，好可能失去以後嘅合作機會。當你需要經常與不同工作風格嘅人合作, 工作有時又會臨時取消或改期，的確需要好高嘅理解能力及經常保持靈活處事態度。

3.善於交際應酬

做freelancer需要主動爭取工作機會。需要喺社交平台上不時撰文、發佈相片，從而建立自己嘅個人品牌。好多時要出席交際應酬，聯絡唔同嘅人不停搵工作機會。如果性格內向，就未必適合做freelancer。

4.良好儲錢習慣

做freelancer雖然好自由，但喺收入就非常唔隠定。市道唔好嘅時侯可能幾個月都無工作，有時完成左一份工作之後又要等幾個月甚至半年不等先收到報酬。如果唔好彩，仲可能會被僱主拖欠薪金甚至走數。所以有良好嘅儲錢習慣，長期存有幾個月至半年嘅儲備基金，對freelancer嚟講係非常重要。另外，要識得保護自己，簽定合約。絕大部分freelancer都會給予客人invoice及收據，甚至制定合約，保障雙方及避免爭拗。

5.良好時間管理及自律

拖延症好多人都有，無老世監控底下工作就更加容易分心及懶散。如果唔可以如期交貨就好容易失去再次合作嘅機會。嚴重嘅會破壞口碑，可能會失去一連串工作機會。自由工作者好需要自律工作，做好時間管理。一定要搵到最合適自己及幫助自己可以專注嘅工作地點及方式，咁先可以長久維持freelance嘅工作模式。