【Slash人生】九十後斜槓青年的多元人生（Slasher 收入、優點、缺點）

搵工平台Moovup好工速遞 | 2021/01/18

Slasher（斜槓族）同時擁有多個職業同身份，打破傳統朝九晚六全職嘅概念，以兼職、自由工作者、一次性工作合約或短期項目形式被僱用。選擇工作嘅時候以興趣行先，追求心靈滿足感。你可以係一個全職待應朝早返餐廳、夜晚就做健身教練。又或者兼職店務員，同時又係一個專業化妝師加攝影師。斜摃族可以享受多元化工作，接觸唔同工種同客戶，唔會畀一個職業身份規範，並擁有彈性嘅工作時間同多於一個收入來源。成為斜槓族帶嚟嘅好處有好多，因此吸引越嚟越多人加入斜槓族行列。斜槓族更唔係年青人嘅專利，需要兼顧家庭同維持生計嘅媽媽、擁有多年社會同工作經驗嘅中年人都紛紛加入斜槓一族。

九十後斜槓族故事

Karin由中學開始就做過好多兼職，例如餐廳侍應、私人補習老師、美容顧問同研究助理等。鐘意嘗試新事物嘅Karin之後去咗一間初創公司工作，由於佢可以彈性調配工作時間，自由選擇工作地點。由個時開始，Karin就開始體會到，只要有一部電腦在手，佢就可以隨時隨地喺任何地方工作。因此，就萌生咗做Slasher嘅念頭。29歲嘅Karin已經成為Slasher四年，現時佢係一間個人形象品牌公司嘅創辦人、美食 blogger同顧問公司項目管理主任。Karin專門幫公司同個人喺線上（LinkedIn）同線下（履歷表、求職信、面試、衣著、儀態）做個人品牌形象管理。佢亦都係一個美食達人，經常喺 Instagram用相片同文字介紹餐廳嘅食物同環境，幫唔同餐廳做宣傳推廣。同時，佢係一個科技培訓公司項目管理主任，幫各大公司進行人才培訓同提升佢哋對最新科技嘅認識。Karin身兼三職，每一個斜槓身份都係由自己嘅興趣同熱誠發展成為事業。彈性工作時間同可觀收入，畀Karin有好大自由度選擇最啱自己嘅生活方式。佢認為每一個人都可以多元化發展自己嘅興趣同技能，無需要局限自己嘅人生。

Slasher（斜槓族）好處

做Slasher等於自己做老世，可以享有彈性工作時間同地點，自己能夠選擇多樣化工作，收入亦可以比全職多。有好多Slasher嘅工作種類都只需要一部電腦就可以處理公事，唔受地域同時間限制，仲可以一邊去旅行一邊做嘢。係商業世界急促變化嘅年代下，Slasher同時擁有多項技能同收入，事業發展上可擴闊視野同能力，會變成比傳統工作更有安全保障。例如疫情之下，如果其中一份工作收入大減甚至被裁員，至少仲有其他工作收入可以補足。

Slasher（斜槓族）壞處

做一個Slasher就好似開咗一間一人公司咁，無論搵生意、線上線下宣傳、文書、合約處理、設計、會計，甚至追討酬金都係自己負責。而且人工唔穩定，無特定工作時間，有好多時候星期六日都要工作。由於Slasher無特定工作時間，因此大多數嘅客戶都期望可以隨時隨地都搵到你。當工作量太多，同時兼顧幾份工作嘅時候，係所面對嘅精神壓力可能比做全職更大。當工作量太少，同時又面對財政緊絀嘅時候，亦未必可以只選擇自己感興趣嘅工作。尤其係成為Slasher嘅初期，你付出嘅時間同心機都未必同收入成正比。因此，Karin話搵一個「就算無錢收，都會令你享受期中嘅職業」非常重要。如果想享受做Slasher帶嚟嘅好處就必需要自律、有時間觀念、努力建立個人品牌同口碑。

如何成為Slasher（斜槓族）

加入做Slasher之前要做好作品集、幫自己宣傳、了解市場情況、競爭對手嘅動向，鎖定客戶群同儲客源。好多Slasher都會將自己嘅作品集放喺Instagram、Facebook同Blog，宣傳自己嘅個人品牌同服務。喺成為Slasher嘅初期，未必即刻會有人購買你嘅服務。喺創業初期，你可能需要免費提供服務，建立口碑，希望得到客戶嘅推薦，最後取得收入。 Karin話做Slasher需要有冒險精神，亦唔好怕蝕底。佢啱啱開個人形象品牌公司嘅時候，都用咗4個月免費幫唔同嘅朋友度身訂造提升個人形象品牌計劃。包括重新編輯LinkedIn個人檔案、履歷表同求職信；進行模擬面試，幫助提升面試技巧；並提供職場服裝儀容指導，提升專業形象。而佢嘅飲食Instagram帳戶都係喺免費寫食評嘅階段，希望有一日會有餐廳贊助佢嘅貼文。Karin相信只要用心做好每一個服務、成功儲落一班客源，建立口碑，你嘅服務同技能都會為你帶嚟收入。

Slasher（斜槓族）應如何保障自己

成為一個Slasher需要有良好溝通技巧、時間管理，同時識得管理客戶合理期望。為保障雙方權益，Slasher同僱主合作之前，需要傾好合作條款同條件。並將合作條款同條件都列明喺單據同合約上面。例如，完成服務當日起嘅7-14日內需要繳交酬金餘額，保護自己嘅權利同現金流。市面上有網站提供免費單據範例畀你設計同下載自己嘅單據版本。同時，Slasher應該保留所有同客戶嘅電郵對話同交易單據。另外，喺提供服務之前亦可以要求客戶先畀3至5成訂金。除此之外，管理客戶期望都好重要。Slasher如果唔識訂立底線，彈性工作時間就會變成全天候24小時候命工作。