【工作空窗期】失業空白1年 4個空窗期理由

【工作空窗期】失業空白1年 4個空窗期理由

因為疫情有好多人失業,有部份人甚至失業半年至一年不等。其實工作空窗期好普遍,一間公司請人最重要都係睇應徵者嘅經驗同背竟適唔適合個職位。其次就係面試表現、對工作嘅熱誠同有無積極態度。喺空窗期期間如果有做freelance、進修或者義工都不妨寫上CV,顯得自己有充份運用空窗期嘅時間增值自己。另外,我哋絕對唔建議不誠實改動CV,縮短工作空窗期。當僱主或HR仔細問到離職原因嘅時候,通常都好容易會被拆穿,而損失誠信,甚至失去工作機會。如果想合理地解釋空窗期,可以參考以下例子。

1. 個人進修

喺工作空窗期或失業期間報讀進修證書課程、增值自己,係一個積極同上進嘅表現,並且可以增加面試印象分。面試嘅時候不妨向僱主同HR提及你可以點樣喺公司實際應用新技能,從而表現出自己係適合該職位空缺嘅人選。有興趣進修嘅人士可以考慮用政府提供嘅$20,000持續進修基金,或者參加僱員再培訓局各大社福機構提供嘅職業進修課程。僱員再培訓局提供部份或全數課程資助,合資格嘅人士完成課程之後仲可以獲取額外現金津貼。

2. 照顧家人

因為各種理由需要暫時離開職場,照顧屋企人,每個人都會諒解。通常僱主同HR都會專重求職者嘅私隱,唔會詳細多問內容。

3. 身體健康問題

如果大病在身或工作勞損,需要休養係無可厚非。求職者只要面試嘅時候表示你已經休息足夠,而且預備好可以重投工作,大致上都無咩問題。

4.工作假期/旅行

有啲求職者會放低工作、去工作假期或旅行增廣見聞,僱主都見怪不怪。見工嘅時候可以重點提及旅行點樣令你思路更清晰、調整未來路向同學習到嘅軟技能。例如工作假期嘅時候,同唔同年齡、文化背景嘅人相處,令你提升英語水平、解決問題嘅能力同擴闊視野。表現出你嘅經歷係有利工作,幫助個人發展。

「工作空窗期」唔係一個問題,只要喺面試嘅時候如實講出原因,畀僱主感覺到你已經準備好返工就無問題。其實面試最後都係聚焦返喺應徵者係咪真係適合個職位,所以求職者無需太擔心被問到有關空窗期嘅問題。