【勞工法例】418規則 （連續性合約）
418規則即係如果僱員連續為僱主工作 4 星期或以上，而每星期最少工作 18 小時，咁樣僱員嘅合約就符合「連續性合約」嘅條件喇。如果符合連續性合約嘅條件，員工可以享有以下額外嘅權益咖！唔講真係唔知兼職都可以有咁多福利！不過好可惜，實習生(intern)係無分咖！
休息日 - 每返足七日就可以放一日假咖喇！但係有薪定無薪，就要自己同老闆斟
疾病津貼 - 喺你同老闆打工嘅頭一年內每做夠一個月，就可以累積兩日嘅有薪病假咖喇！第一年之後每個月就會累積4日病假。如果你連續病咗四日或以上無返工，又儲夠有薪病假，又有醫生紙，老闆要出每日平均工資嘅五分之四糧比你咖！但係要係連續4日以上嘅病假先有呀！
產假 & 侍產假 - 如果連續性合約滿咗40星期，準媽媽就可以放10個星期嘅有薪產假；準爸爸就可以放5日有薪侍產假咖喇！
遣散費 - 如果你嘅連續性合約滿咗24個月之後不幸被裁員或被停工，你係有得攞遣散費咖！
長期服務金 - 如果你嘅連續性合約滿咗5年而唔係因為你犯大錯或裁員而被解僱或不被續約，你係有得攞長期服務金咖！但係提提你呀，遣散費同長期服務金只能二選一咖咋！
法定假日有糧出 - 如果你嘅連續性合約滿咗3 個月，你就唔駛再放無薪假喇！
有薪年假 - 如果你嘅連續性合約滿咗12 個月，你可以放annual之餘，仲要係有糧出咖！
針對解僱或者更改僱傭合約嘅僱傭保障
當然，以上係概要，如果要知有啲咩條款同細則，記住㩒以上嘅links去勞工處網站睇清楚呀！